Southerner — Trending with Nancy Mbaegbu
Sunday,May3, 2026

Some videos no be the kind wey you watch finish and just scroll pass… some go just sit for your chest like stone, because wetin you just see no even resemble something human life suppose go through at all.

That’s exactly the reaction wey follow one disturbing incident for Effurun, near Warri, Delta State, where one young man identified as Mene Ogidi take lose him life inside case wey don turn serious allegation of extrajudicial killing.

For the viral video, Ogidi don already dey restrained—him hands tied for back, him just sit down for ground. No resistance, no threat. Just a young man wey dey beg for him life. In Pidgin, him dey plead say him fit take some policemen go Sapele to meet the person wey allegedly mislead am. “Officers, abeg, I go tell you everything…” na wetin him dey talk.

But before anybody fit even process wetin dey happen, one officer identified as ASP Nuhu Usman allegedly opened fire for close range. The young man collapse instantly, and lthe whole place just scatter with shock.

As the story dey spread, another angle enter. Sef acclaimed Human rights activist, Harrison Gwamnishu come identify the victim as Oghenemine, one upcoming music artist wey dem know as OG Million.

According to am, the family don already declare am missing before confirmation later show say him don kpai. He also allege say the boy just go collect waybill for somebody, waybill wey dem later talk say contain firearm – but instead of proper investigation, the whole thing escalate enter fatal level.

But omo… the part wey really break people heart na wetin come from the boy’s house.

During condolence visit, Oghenemine mama break down in tears talk say this no be her first time to loss pikin to police. According to her, na the second son wey she don lose like this. “They first take my son in 2022, now dem don take another one again… how I wan survive this?” she cried. That statement alone left many people quiet, because this one no be just news again, na real pain.

Online, reactions full everywhere. Some people dey vex, some dey heartbroken, others just dey ask how many times this kind thing go still happen before real change go come. One person write say, “This no be one bad officer matter again, this na full system problem.” Another talk say, “Na so this kind story dey trend, people go shout finish, then everything go just die down again.”

Meanwhile, police side still maintain say the suspect bin dey with firearm and ammunition when dem arrest am. But the same viral video wey show am restrained and begging don make many people dey question that narrative well well.

As pressure begin mount, the matter come take another turn. Inspector-General of Police, Tunji Disu don order say make dem dismiss and prosecute the officers wey get hand for the incident. According to wetin come out, dem say the main officer, ASP Nuhu Usman, violate police rules on use of firearm, and wetin him do no just dey wrong, e go against everything wey the uniform stand for.

All the officers wey dey involved don move go Abuja for further disciplinary process, and police don talk say after all the internal procedure, dem go face proper prosecution. Dem even add strong line say no uniform give anybody right to take life anyhow, and say this time, justice go not just happen, people go see am.

But even with all these promises, one thing still remain heavy for chest; Oghenemine don lose him life, and one mother dey now mourn not one, but two taken by the same system wey suppose protect them.

And as everything dey unfold, Nigerians still dey watch with one eye open because we don hear “justice go happen” tire. The real question now be: this time, e go truly reach the end or this one go still fade like others before am?

Roby Ekpo’s love story goes wrong

Some relationships ehn… if dem turn am to movie, you go swear say the writer wicked or high on something strong. Because how you go love person for 11 years, send money, send flowers, send your whole heart, only to later realize say na you be unpaid sponsor for somebody else’s soft life?

So Roby Ekpo carry him full chest go The Honest Bunch come open book of lamentation after videos and photos of his estranged wife’s new wedding start to flood online

Before we enter the chaos, make we know the main character well well. Roby Ekpo na Nigerian On-Air Personality (OAP), a media guy wey don spend years for broadcasting. Lowkey, but not new to the entertainment scene.

Now back to the premium heartbreak… Roby talk say while him dey here dey hustle and love genuinely, him wife Mayowa Lambe dey abroad living what we can only describe as “selective wifehood” Because apparently, communication for that marriage be like NEPA light—highly unstable.

Now the part wey make people shout “eh God”—this man, at 48, no child, come begin suspect himself. He even go do sperm test, something wey no easy for a typical Calabar man wey pride dey involved. Only to later discover say madam dey use contraceptives all through their marriage

As if that one never do, madam allegedly travel go Miami tell am say na treatment to help her conceive… only for am to later realize say the “treatment” na full BBL package. My dear, love is blind, but this one wear blindfold, add dark glasses join.

Roby no stop there. Him say for six solid years wey madam dey abroad, from the small N500k gigs wey him dey do, him go send N200k give her—plus flowers wey he even dey beg people for U.S. make dem help deliver; talk about love with logistics. But communication? Zero. Messages dey enter voicemail like permanent tenant.

Then the reunion wey suppose sweet like Nollywood happy ending come turn horror film. Baba carry two cars go airport with full excitement… only to receive cold reception. No hug. No kiss. Nothing. Omo, he even confess say him sleep for sitting room for TWO DAYS. At that point, even neighbor go know say something no dey right.

And just when you think say e don finish, final straw drop—he claims say the “male flatmate” wey him manage give space na actually full-time boyfriend. Cherry on top? Then, him come see picture of madam chilling on another man’s lap for restaurant. Omo… na there remaining hope kpai completely.

As the internet dey drag and dissect Roby’s story, Mayowa Lambe’s new husband no waste time enter the chat. In him own words, “The ones in my corner understand me. I don’t owe explanations, and that’s enough. The path to greatness leaves no room for weakness, only strength. Falsehood may travel fast, but truth arrives with consequences.” Abeg, motivational speaker or damage control? You decide.

If that one never shake table reach, another grenade follow. Reports come out say Mayowa don allegedly serve Roby Ekpo cease-and-desist letter, demanding either a public apology or a whooping N100 million within 48 hours. Yes, you read that right—48 HOURS. No be film trick, real life tension.

At this point, this gist don pass heartbreak enter legal warfare. Because wetin start as “he said, she did” don turn full courtroom loading. Omo, relationship wey begin with love letters don upgrade to legal letters.

But as we dey enjoy this hot gist, make we still balance am small—na only Roby side we hear in full detail. Even with this new response flying around, the complete picture never still land finish. And you know say for this country, every story get Part A, B and sometimes even Part Z.

Until then, one thing remain clear: some relationships no just dey crash, dem dey detonate. And this one na premium chaos subscription with extra data.

Ayo Kuti’s viral virginity confession

My people, if oversharing get award, some people go dey fight for gold medal for this year because the things wey dey come out from livestreams these days no be here.

Tell me why Ayo Kuti just carry him family gist come drop online like say na public service announcement?

The internet no even recover when he jumped on livestream with ravdeal and started talking with full confidence—no filter, no hesitation, just vibes and controversial energy. And before anybody fit say “wait first,” baba don already open chapter one of “Things Your Parents Didn’t Ask You to Share.”

According to Ayo, the reason wey him take lose him virginity at 16 no be peer pressure, no be love story, na competition. Yes—full blown competition. Because in his words, him papa Femi Kuti tell am say he lost his own at 17, and Ayo said “nah, I must break record.” This no be Olympic mindset but wrong category?

He even add say, “you have to know say e dey shake, e dey break. My dad is a bad boy.” Sir, who send you this vibe?

But if you think say na there the gist stop, my dear, sit down. Because baba still drop another bombshell wey make people hold their head. He claimed say his parents no even dey sleep for the same bed, and according to am, na because of STD-related concerns. Omo, at that point, even the livestream sef look like it regretted inviting him.

Now, make we do small rewind. Ayo Kuti no just be anybody, na from the legendary Kuti dynasty wey give us Afrobeats royalty, Fela Anikulapo Kuti. With a father like Femi Kuti and that strong family legacy, people already dey expect certain level of depth, culture, maybe even small activism. But instead, na family secrets and bedroom arrangements we dey analyze. Life no balance sometimes.

As expected, social media no carry last. One user wrote, “Some things are not content abeg, this one na oversharing pro max.” Another said, “Competition with your dad over virginity? Omo this is a new one.” While some people tried to defend him, saying, “At least he’s being honest, not everybody go pretend.” But majority agree say this one na information wey suppose remain in the family group chat.

Now the real question be: na boldness or just lack of filter? Because in this age of livestreams and clout, the line between being real and being reckless don dey blur small small. And Ayo? Him just enter that zone with full chest.

At the end of the day, no be every gist suppose trend. Some stories fit just relax… because once e enter internet, na forever content be that.