Southerner Xtra — Trending with Nancy Mbaegbu
Sunday, May 10, 2026

Just when everybody think say this long-time triangle between Tonto Dikeh, Rosy Meurer and Olakunle Churchill don finally rest and everybody don mature, life just press reset button and talk say, “una never see anything.”

Gist wey dey fly now be say Rosy and Churchill don quietly unfollow each other for IG, and rumours of divorce don scatter everywhere like party rice. Omo, Nigerians no even waste time — everybody don carry am for head instantly.

According to reports, madam Rosy allegedly filed for divorce on April 20, and from there, wahala just dey multiply. These two wey marry since 2021 and even get two children together suddenly dey move like strangers online. And you know say for this generation, unfollow na soft launch of problem — once that one happen, na countdown to full drama.

But wait, the real shocker no even be the divorce rumour — na Churchill himself come scatter everywhere when him drop one bold statement wey shock even people wey think say dem don see everything.

Baba come out say: “I was never married to Rosy Meurer.” Omo… internet freeze for like 2 seconds because how?? After wedding pictures, anniversaries, children… na introduction we dey call all those years?

Him even go further talk say no church wedding, no court wedding — na just introduction happen. So technically, no marriage, meaning say divorce wey una dey shout no even get foundation.

Him still throw subtle shade say some “mango tree lawyers” dey produce divorce papers like pure water within 24 hours. Chai… who send this man message like this?

As if that one never choke, baba come address that old narrative wey people don carry for years say Rosy “collected another person’s man.” According to am, that story no get leg at all.

Churchill talk say Rosy was never friends with Tonto, and all those accusations na pure online speculation wey even cause her serious emotional stress. Lowkey, e be like say him dey try defend her but at the same time, confusion still dey. Oga, abeg you dey defend her or you dey drag her small small? Pick one place stand.

Churchill no still rest, because next thing wey follow, him talk say Rosy allowed online pressure influence her decisions and listened to people wey no even sabi media space. Meaning say according to him, outsiders and internet noise contribute to wetin dey happen now. This one come turn blame game with soft background music.

Then baba come drop one line wey make everywhere burst: he said if Rosy no dey there, “someone else would have occupied that position.” That sentence alone cause nationwide emotional damage. Because wetin you mean by that sir?? After everything?? Even motivational speakers go need motivational speaker after hearing that one.

As expected, Nigerians no carry last. Reactions full everywhere: one person shout, “Even as a man… I say fear man!” Another one talk, “If she had not been there, someone else would occupy the position… Ndi nne take note oo!” And one savage soul drop, “So all of us attend introduction for years without knowing? Nigeria we hail thee.”

Still, Churchill try balance the matter small by talking about his children. Him svay as a man, na him responsibility to fix things and make sure all his children know each other and live in unity.

He even talk say nobody dey pray make another man take over him role as father, and him go make sure say he dey present in his children’s lives moving forward. That part at least sound like person wey dey try gather the pieces together even though the table don already scatter.

At this point, my people, na full confusion headquarters. Is he clearing the air or adding more smoke? Is he defending Rosy or subtly dragging her? One minute na “she was misunderstood,” next minute na “anybody fit replace her.”

This gist get layers like onion. Make una no go anywhere because as e be now, we never even reach the last episode.

Oyedepo’s kidnap claim sparks serious controversy

Wonders shall never end in this country wey we call Nigeria, because every day, new level of shock dey unlock! This time around, na none other than David Oyedepo, the founder of Living Faith Church Worldwide (Winners Chapel) and one of Nigeria’s most influential Pentecostal bishops, carry mic-drop statement wey don set social media on fire.

According to the Bishop, if kidnappers ever carry you, just gently hand over his number like say na emergency contact… because apparently, na there your freedom dey wait.

The man of God, while sharing testimony for church, no even sugarcoat am. Him talk say one time kidnappers carry one of their pastors, and his instruction was sharp-sharp: “Give them my number.”

Not only that o, Baba still add serious spiritual gbas gbos say if within 24 hours dem no release the person, the kidnappers go collect final eviction notice from earth. According to am, the atmosphere begin vibrate—and boom, release don happen. Omo, internet practically froze.

As if that one never do, Baba still drop part two like say na series. Him yarn another gist about one of his “daughters” wey dem kidnap. The babe no panic at all o—she just carry boldness wey pass power bank tell the kidnappers: “My father said I’m leaving here by 7am.”

She no even call anybody, no negotiation, nothing. Next thing, according to the Bishop, confusion enter the kidnappers’ camp. Dem begin injure themselves and beg her make she go. At that point, even kidnappers start to dey question their career choices.

Now make we no lie, the message wey Baba dey try pass na faith over fear. He emphasize say Christians no suppose dey live in intimidation because dem don place them far above the devil. But Nigerians? Nigerians no fit ever hear gist like this and keep calm. The streets immediately turn am into cruise headquarters.

Online reactions full ground because everybody just dey drop madness. One person shout: “Drop your number first make we save am in advance!” Another talk say: “Kidnapper go first block the number before operation start.” Someone even add: “If network no dey nko?” Omo, Nigerians no dey disappoint when e reach savage replies.

And if this vibe dey familiar, you no dey wrong. Another man of God, Paul Enenche, don once share similar bold statements about spiritual authority over danger. At this point, e be like say some Nigerian pastors dey operate on a different “Do Not Try Me” frequency entirely.

So whether you believe am spiritually or you just dey observe from cruise headquarters, one thing clear—this gist don enter group chat permanently. Because “give them my number” no be small statement o… na the kind line wey fit make both kidnappers and victims pause and ask: “Wait first… wetin just happen here?”

Moniepoint CEO’s comments on Nigerian talent set social media on fire

Just when Nigerians were trying to survive the usual cost of living crisis and daily “God when?” moments, Moniepoint CEO, Tosin Eniolorunda, carry hot take enter social media square, and everywhere just scatter.

Oga basically looked at the Nigerian talent pool and said, “Guys, we need serious help.” And before anybody say “LinkedIn application rejected,” the internet don already divide into two camps.

According to him, Moniepoint made one serious decision in 2024 say dem no go hire anybody from outside Nigeria again, but instead focus fully on Nigerian talents. But 2025 humbled them quickly.

The CEO revealed say despite having over 500 job openings, finding qualified people don become serious wahala for the company.

He said the few candidates wey dem even find were still not meeting the “global standards” they needed, especially because their competition no be small play at all — na companies from China and other international tech spaces dem dey compete with.

But the statement wey really pour petrol for the whole matter na when oga begin talk about the “general IQ” of the country dropping. Ah ah!! He no even package am softly at all.

According to him, poor education, brain drain, social media influence, Yahoo Yahoo mentality, and hookup culture don seriously affect how many young Nigerians dey reason today.

Oga come drop the line wey scatter everywhere: “The level that people are reasoning in this country is not as high as it used to be.” The moment Nigerians hear that statement, everybody carry keyboard enter battlefield.

Some people agree with am, others start to drag am from Lekki to Aba without breathing space.

The people wey agree say Nigeria’s education system don suffer serious damage over the years. Dem talk say too many youths now dey focus on quick money and soft life instead of building real skills, while plenty brilliant people don japa, leaving companies struggling to find pexperienced hands.

But others no ready to let Moniepoint CEO land peacefully at all. The dragging started immediately like say na national assignment.

One person quickly fired back saying, “How much una dey pay for the global standards?” Another person added, “Who life favor go think say others lazy.”

But the comment wey nearly make people choke with laughter na from one angry applicant wey wrote: “For una company wey dey send rejection email immediately after application, I pour you hot spit.”

As if that one never do, another person simply added, “Help me tell him to return my 20k, I no too get talent.” Because trust Nigerians, even serious national conversation must somehow turn into dragging, cruise, and comedy competition at the same time.

But beyond all the gbas gbos and online cruise, the matter still touch one deep truth wey plenty people no really like to admit. Nigeria get plenty talented people, no doubt at all, but the system itself don frustrate both companies and citizens for years.

From poor education to unemployment, low salaries, brain drain, and everyday survival pressure, everybody just dey point finger left and right while the real issues still dey quietly sit down dey watch everybody suffer.

And honestly, between the CEO’s frustration and the public reactions, one thing wey clear be say; Nigerians don tire. Dem dey defensive, ambitious, talented, angry, hopeful, and still somehow hilarious inside all the chaos. Because even under pressure, Naija no dey ever lose its sense of humour, at all at all.